Indik ISI Denpasar

Institut Seni Indonesia Denpasar

      Institut Seni Indonésia(ISI) Dénpasar inggih punika perguruan tinggi seni sané kaénter olih Kementerian Pendidikan dan Kebudayaan. Punika mawinan yéning selehin saking pepalihannyané, ISI Dénpasar wénten ring sor tur amongannyané tumus ring Menteri Pendidikan dan Kebudayaan. Ri tatkala ngamargiang swadharma, ISI Dénpasar katuntun olih Direktur Jenderal Pendidikan Tinggi Kementerian Pendidikan dan Kebudayaan. ISI Dénpasar kawangun manut ring Keputusan Presidén Republik Indonésia Nomor 33 Tahun 2003 tanggal 26 Mei 2003, pinaka panunggilan pantaraning Sekolah Tinggi Seni Indonésia (STSI) Dénpasar lan Program Studi Seni Rupa dan Désain (PSSRD) Universitas Udayana.

          Sadurungnyané, STSI Dénpasar mawasta Akademi Seni Tari Indonésia(ASTI) Dénpasar, kawangun olih Pemerintah Daérah Provinsi Bali ring tanggal 28 Januari 1967 antuk Keputusan Gubernur Kepala Daérah Tingkat I Bali Nomor 2/Pem/5/I/a/1967, pinaka pakinkin saking Majelis Pertimbangan dan Pembinaan Kebudayaan (Listibya). Pawangunan ASTI Dénpasar kapikukuhin antuk Dasar Kebijaksanaan Pembinaan Kebudayaan Daérah Bali sané satata nguratiang kahanan karajegan (ketahanan), seseleh (penggalian), panuntun (pembinanaan), miwah panglimbak (perkembangan) kebudayaan daérah Bali. Pakilitan budaya miwah téknologi sané nyansan raket tur saling lahlahin, sapunika taler kawéntenan seniman lingsir sané sampun séda, ngawinang makudang-kudang wangun kesenian tradisional Bali kasengsayain pacang punah. Indiké puniki raris sané ngawinang kabuatang pisan kawéntenan pendidikan kesenian majeng ring génerasi muda pinaka panami miwah pangraksa kebudayaan bangsané.

          Sesampuné kalih warsa kawangun, ASTI Dénpasar nerima status penegerian saking Départemen Pendidikan dan Kebudayaan antuk rerepi Keputusan Nomor 066/1969 tanggal 7 Agustus 1969 saha ASTI Dénpasar karanjingang pinaka jurusan saking ASTI Yogyakarta sané kaénter olih Direktorat Jenderal Kebudayaan Départemen Pendidikan dan Kebudayaan. Salami 8 warsa ngamargiang pendidikan ring sor Direktorat Jenderal Kebudayaan tur kawéntenan pauwahan papalihan organisasi sajeroning Départemen Pendidikan dan Kebudayaan, punika ngawinang ngawit saking warsa 1976 utsaha ngénterang ASTI Dénpasar kaambil olih Direktorat Jénderal Pendidikan Tinggi, saha panuntunan kautsahayang mangda prasida nyujur pawangunan Institut Seni Indonésia (ISI) kasarengin antuk akademi-akademi kesenian sané lianan ring Indonesia.

          Malarapan antuk Keputusan Menteri Pendidikan dan Kebudayaan Republik IndonésiaNomor: 0445/0/1988, ASTI Dénpasar katincapang statusnyané dados Sekolah Tinggi Seni Indonésia (STSI) Dénpasar. Pawangunan STSI Dénpasar kapikukuhang antuk Surat Keputusan Présiden Nomor 22 Tahun 1992.

        Ngawit saking tanggal 1 Oktober 1965 PSSRD sané pinaka pahan Jurusan Seni Rupa Fakultas Teknik Unud malarapan antuk Keputusan Menteri PTIP RI Nomor 240/Sek/PU/1965 tanggal 20 Oktober 1965. Madasar antuk Keputusan Rektor Unud Nomor 483/SK/ PT.17/R.VIII/1983 tanggal 10 Mei 1983, PSSRD Unud kaadegang pinaka program studi antarfakultas, kakukuhang antuk Keputusan Dirjen Dikti Depdikbud Nomor 5/DIKTI/Kep/1984 sajeroning kawigunannyané ri tatkala ngamargiang Tridharma Perguruan Tinggi.
Antuk tetimbang ngeninin indik konséntrasi pendidikan tinggi seni mangdané prasida ngrajegang budaya, tur antuk sokongan saking Ditjén Dikti Depdiknas, Pembda Bali, miwah masyarakat Bali, punika ngawinang kakawitin utsaha nyikiang kalih lembaga kesenian STSI Dénpasar sareng PSSRD Unud manados asiki perguruan tinggi seni, ngawit saking warsa 1993 kalanturang raris ring warsa 1999. Ring tanggal 28 Juli 2003 Menteri Pendidikan Nasional (Prof. Drs. Abdul Malik Fadjar, M.Sc) ngresmiang pawangunan ISI Dénpasar, kacihnayang antuk panglinggatangan prasasti sané magenah ring Gedung Natya Mandala ISI Dénpasar.

Visi dan Misi

Lambang Lan Bendera

        ISI Dénpasar madué lambang sané kabaos Siwa Nataraja maka pamurtian Siwa pinaka adidewata pangréka seni. Pinaka adidéwata pangréka seni, catur tangan Idané soang-soang ngagem pustaka suci (niasa kawruhan); gurnita pakarana (pinaka niasa seni miwah budaya); genitri (niasa paiketan miwah kasaktian kawruhan); miwah pecut (niasa panuldul miwah pangwisésa kawruhan). Déwa Siwa sané ngadeg ring luhuring padma, kasongsong antuk kurma ageng (pinaka niasa kasukertan jagat). Padma wantah niasa Ida Sang Hyang Widhi Wasa, sapunika taler prabha sané ngiterin pinaka niasa kawisésan Ida Sang Hyang Widhi Wasa. Warna barak sané pinaka dasar pinaka niasa uleng pikayun miwah rasa tresna, tur warna sakadi emas sane wenten sajeroning lambang pinaka niasa kaagungan seni, kawruhan, miwah teknologi.

       ISI Dénpasar madué kalih bendera antuk warna dasar barak manggis, masukat 3 (tiga) mabanding 2 (dua), lambang ISI Dénpasar sané mawarna kuning magenah ring tengahnyané. Bendera ISI Dénpasar kaanggén ritatkala wénten upacara akademik utawi upacara linan sané anut.

Himne Miwah Mars

       ISI Dénpasar madué himne sané kabaos Himne ISI Dénpasar. Lagu miwah syair himne puniki karipta olih I Gusti Nyoman Panji. Himne ISI Dénpasar madué kasuksman, majalaran antuk Tri Dharma Perguruan Tinggi ngwangun kawagedan jadma sajangkepnyané, antuk kawikanan sajeroning nyelehin, nuntun, miwah nyéwaka ring seni budayan bangsa.

      ISI Dénpasar madué mars sané kabaos Mars ISI Dénpasar, sané lagu miwah syairnyané karipta olih I Gusti Bagus Ngurah Arjana. Mars ISI Dénpasar madué kasuksman pinaka panuldul rasa jengah érang saking civitas akademika ISI Dénpasar sajeroning ngwangun budaya bangsa malarapan antuk Tri Dharma Parguruan Tinggi.

Tari Kebesaran

       ISI Dénpasar madué tari kebesaran sané kabaos Siwa Nataraja. Penata Tari miwah penata busana inggih punika N.L.N Swasthi Widjaja Bandem, tios punika sané ngripta tetabuhan pengiringnyané inggih punika I Nyoman Windha. Tari Kebesaran nyihnayang pamurtian Siwa pinaka penari sane ngutpatti jagat malarapan antuk tari. Pinaka déwataning penari, Siwa Nataraja satata masolah sané ngawinang medal sabda miwah kasukertan jagat. Prabha saking kawisésan miwah kasucian Siwa raris matunggilan, gumanti prasida karéka jagaté rauh sadagingnyané. Tari Siwa Nataraja kakedeng antuk 9 (sia) diri pragina tari, Asiki pinaka Siwa, tur sané 8 (kutus) lianan wantah niasa saking praba kawisésan miwah kasucian Siwa. Sesolahan Siwa Nataraja wantah pinaka pasatmian pantaraning seni tari Bali miwah baga-baga tari Bharata Natyam, sané matunggilan nénten kapasahang.

Loading...